Սվիտր

Կարոտում եմ քեզ:
Դու գնալուց առաջ հոգուս հագցրեցիր ծակող բրդե սվիտր: Հույս ունեիր, որ սվիտրը կտաքացնի ինձ Ու ես չեմ մրսի քո գնալուց հետո:
Չեմ մրսի, երբ քո փոխարեն գա սառցե ձմեռը:
Գիտես կարոտը ու այս սվիտրը ծակում են ինձ: Չգիտեմ. մրսում ես հիմա երևի: Ես քեզ սվիտր չեմ հագցրել:

Դու արև ես, իսկ ես` լուսին

Դու արև ես, իսկ ես` լուսին,
Ես լույսս քեզնից եմ ստանում, Անդրադարձնում քո փառահեղության փոքրիկ կաթիլները: Մարդիկ պաշտում են քեզ` վախենում, իսկ ինձ սիրում են` երգեր հորինում... սիրահարվում, իրար սիրում իմ `քո, լույսի ներքո... Առանց քեզ չեմ լինի ես... Բայց դու չգիտես սիրո մասին: Դու միայն տիրանում ես, իսկ ես հնազանդ սիրում քեզ... Մենք իրար հետ ենք, անբաժան, բայց հեռու և իրականում միասին չենք... մենք տեսնում ենք իրար միայն երբ մեկս հրաժեշտ է տալիս... Մենք իրար դիմաց ենք... Ես նայում եմ քեզ ակընդետ, իսկ դու ուղղակի ժամանակ առ ժամանակ հայացք ես գցում վրաս... Ես փոփոխական եմ, իսկ դու միշտ նույնը... Ես կիսվում, կլորանում, սրվում և պրկվում եմ մեր` իմ սիրուց, երբեմն նույնիսկ անհետանում... Դու չես վախենում կորցնել ինձ, քեզ համար իմ լինել չլինելը նույն է: Իսկ առանց քեզ ես ոչինչ եմ... ուղղակի մի ահռելի քարի կտոր: Քո սերը, որը սակայն գիտակցված չէ քո կողմից ինձ այրում է... Ես այրվում եմ քեզնով, այս մութ կաթնագույն տիեզերքի մեջ...